قصيدة في قبيلة أكلب لعفوهم عن محمد بن سعد الشرمي الهاجري – الشاعر صلاح الهاجري

يا سلايل عمر ابن كلثوم والزير وكليب 

يا سلايل تغلب اللي تكسر العظم الصليب

يا اهل الخيل العوادي من زمان الجاهلية 

يا هل رماح البلنزا يا هل الجمع الرهيب

يا عزاز نفوس وحماة الغروس وصلب روس 

يا اهل السفرين سعد اللي زبنها والطليب

يا حرار ما توكر غير في زامي النوايف 

يا حصون للحمى لا من عوى ذيب لذيب

يا رواسي يا قواسي يا سعود ٍ للدخيل 

يا متعبة الركاب مجريّه للي يهيب

يا هل بيوت تذري بالذرى يوم النوايب 

يا هل الدهم الدواهي يا منوخة الصعيب

ذخر ذود لا ارزمت واكلب تطانخ من طناها 

ترتع بضف التغالب تارد عدود الشريب

الصبي منهم على الهقوه بعيدين الهقاوي 

الصبي منهم براسه والحميا للقريب

زينهم يوم السعايد شينهم يوم المغيرة 

حلوهم وقت السلايم مرّهم سقم الحريب

جمعهم لا اقبل بجوخ وشلف فجاجة نحور 

من سطرها تخضع العاصين للجمع المهيب

من ضرايبها تشـــّبع كل سبع وكل حايم 

يشهد التاريخ في ماضي الزمان ومن قريب

مفنية كوم ترادم بالشحوم ظهورها 

سعد من حده زمانه لا ارتخى حبل السبيب

راية بيضاء ترز لعين بيضان الوجيه 

والنواميس اكلبيه يا مدلهة الغريب

بيض الله وجه ابو عبدالرحمن ولا بته 

الحصان معرب الجدين للعله طبيب

يا صليب الراس هداج المراجل والطناخة 

عن مواريث الجدود ولا يحيد ولا يغيب

صبوا السمن ليمينه واخفقي له يا بيارق 

هيلعي ٍ صيرمي ٍ ما تضرى بالغبيب

ضاري ٍ يقدح زناده من زناده والفتيل 

تبرك الصعبة وترضخ لاحمر العين اللبيب

الصميدع لا انتهض يشهر كما حر شهير 

متعب الهقوات والصملات مضرابه عطيب

ما تكاثرنا على اهل الطيب خزنة طيبها 

تمتلي وتفيض والجزلات تندبها نديب

يا سلام الله على كل اكلبي وتغلبي 

للشيوخ وللجبر من مشرق الشمس لمغيب